Oqaaseqaatit nalinginnaasut
Raajanut akitsuutit 1. januar 2002-miit atuutilersumik 3 procentimiit 1 procentimut appartinneqarnissaannik siunnersuut marlunnik tunngaveqarpoq.
Siullermik, raajat qalipaajarneqanngitsut nunarsuarmi niuerfinni akii suli appasipput, naak pitsanngoriaateqartoqarnissaa ilimanarsinnaagaluartoq.
Aappassaanik, raajanut akitsuusiisarnerup allatut aaqqissuunneqarnissaannik APK-p Akileraartarnermilu Pisortaqarfiup suleqatigiillutik siunnersuusiornissaat piffissamik sivisunerusumik atuiffiusariaqarpoq. Avataasiorlutik raajarniarlutillu kilisaatini nioqqutissiortut immikkut ittumik akileraarusiivigineqarnissaat (akileraarusiinerup nalinginnaasup saniatigut akileraarummik/akitsuummik) politikkikkut piumasaappat, taama immikkut ittumik akileraarusiineq taamaallaat atuuttariaqarpoq akileraarutit ilanngaatigineqartinnagit sinneqartoorutit aalajangersimasumik annertussuseqartillugit. Kiisalu immikkut ittumik akileraarusiineq umiarsuaatileqatigiiffinni nalinginnaasuni pissusiviusunut naleqquttuusariaqarpoq, aammalu nioqqutissat akiisa, ilaatigut agguaqatigiissillugu akit aammalu aningaasartuutit, soorlu orsussaq, poortuutissat assartuinerlu, allanngorarnerat ilutigalugu aaqqiissutaasinnaasunik periarfissaqartariaqarluni. Taamaammat raajanut akitsuutit taakkulu naatsorsorneqartarnerannut allannguutissatut siunnersuutinik taamaattunik, 1. januar 2003-miit atuutilernissaat siunertaralugu Inatsisartut 2002-mi ukiakkut ataatsimiinnissaanni saqqummiussisoqarnissaa naatsorsuutigineqarpoq.
Siunnersuut una kiisalu "raajanut akitsuuseeriaatsimik nutaamik" suliaqarnerup ingerlaannarnissaa APK-p isummat taakku aallaavigalugit tapersersorpai.
Kiisalu siunnersuutip uuma imaraa angallatinik attartornertigut assigiinngitsutigut il.il. akitsuutinik akiliisussaatitaanerup erseqqissarneqarnera.
Raajanut akitsuutit 2 procent point-inik appartinneqarnerisigut ukiumi naatsorsuuseriffimmi 2002-mi aamma ukiuni missingersuusiorfiusuni isertitassatigut annaaneqassapput ukiumut 15 mio. kr.-nit, siunnersuullu allaffissornermut sunniuteqartussaanngilaq.
Aalajangersakkanut ataasiakkaanut oqaaseqaatit
§ 1, nr. 1-imut
Erseqqissarneqarpoq raajat, nunat allamiut angallataat attartukkat atorlugit pisarineqartut raajanut akitsuutaat akuersissummik peqartup akiligassarimmagit, angallat tamakkiisumik atortulersugaq inuttaqareersorlu attartugaanersoq imaluunniit inuttaqartinnagu attartugaanersoq apeqqutaatinnagit.
Aammattaaq erseqqissarneqarpoq raajat Kalaallit Nunaata imartaani pisarineqartut kisiisa raajanut akitsuutinik akitsuuserneqassammata, taamaattumillu raajat soorlu immami NAFO-mit aalajangersaavigineqartumi, Svalbard-ip imartaani imaluunniit nunat allat aningaasarsiutigalugu aalisarfiini, Kalaallit Nunaata isumaqatigiinniarnertigut aalisarsinnaanermik akuersissuteqarfigineqarfiini pisarineqartut raajanut akitsuutinik akitsuuserneqartussaanatik.
§ 1, nr. 2-mut
Siunnersuutigineqarpoq akitsuusigassat 1 procentimik akitsuuserneqarnissaat.
§ 2-mut
Siunnersuutigineqarpoq inatsisip ulloq x. maj 2002-miit atuutilernissaa, ullorlu 1. januar 2002-miit atortuulernissaa.